Ташкилоти ҷамъиятии ҷавонони «Созандагони Ватан»-и Ҳизби халқии демократии Тоҷикистон имрӯз ба муносибати солгарди таъсиси ҳизб таҳти унвони «ҲХДТ дар ҳар як оила» аксияи умумиҷумҳуриявӣ доир менамояд.
Дар суҳбат бо хабарнигори ОИ «Азия-Плюс» раиси ташкилоти «Созандагони Ватан» Адҳам Мирсаидов дар ин робита изҳор кард, ки ҳадафи аслӣ аз иқдоми мазкур таблиғи афкор ва ҳадафҳои ҲХДТ аст.
«Дар доираи ин чорабинӣ имрӯз дар саросари ҷумҳурӣ ихтиёрини ҳизб ба аҳолӣ тақвими соли 2013 бо нишони ҳизбро ройгон тақсим хоҳанд кард», – гуфт ӯ.
Номбурда афзуд, оғози аксияи «ҲХДТ дар ҳар як оила» дар саросари кишвар нимаи имрӯз дар назар аст.
Ташкилоти ҷамъиятии ҷавонони «Созандагони Ватан»-и ҲХДТ моҳи апрели соли гузашта таъсис дода шуда, моҳи ноябр дар Вазорати адлия сабти ном шуд. Айни замон шумори аъзои ташкилот ҳудуди 12 ҳазор нафар ҷавононро ташкил медиҳад. Ғайр аз ин, ҳудуди 52 ҳазор нафар аъзои ҷавони ҲХДТ низ ба сафҳои ташкилоти «Созандагони Ватан» шомил шуданд.
Ҳизби халқии демократии Тоҷикистон соли 1994 таъсис ёфта, айни замон шумори аъзои он беш аз 175 ҳазор нафарро ташкил медиҳад. Раиси ҳизб президенти Тоҷикистон Эмомалӣ Раҳмон мебошад. Аксари аъзои ҳукумат, вакилони палатаи поёнии парлумон ва маҷлисҳои маҳаллии вакилони халқи вилоят ва шаҳру навоҳии ҷумҳурӣ аъзои ҲХДТ мебошанд.
