Даъвои саҳҳомони ширкати сохтмонии «Мовароуннаҳр» мусбат ҳал шуд. Санаи 20-уми май суд таъҷилан ин даъворо баррасӣ кард, «то ки вазъи беҳад муташанниҷ»-ро муътадил созад.
Тавре ба ОИ «Азия-Плюс» намояндаи ваколатдори саҳҳомони ҶДММ «Мовароуннаҳр» Бузургмеҳр Ёров хабар дод, дар мурофиаи судӣ ҳудуди 250 нафар саҳҳмон ширкат варзида, пас аз шунидани далелҳои онҳо, суд оид ба аз ҳабс озод кардан ва ба саҳҳомон баргардонидани иншооти сохтмонаш нотамоми ширкат таъинот содир намуд. «Қарори иҷрочиёни судӣ аз 30-юми апрели соли 2013 дар бораи ҳабси амволи ширкатро низ суд беасос ва ғайриқонунӣ унвон кард», – иброз дошт ӯ.
Ба қавли Ёров, сариҷрочии суди ноҳияи Сино Қиёмиддин Ниёзов дар суд изҳор намудааст, ки чунин вазъ бинобар сабаби дар ҳукми Суди олӣ ва варақаҳои иҷро ҷой доштани мафҳумҳои мухолифи якдигар ба вуҷуд омадааст.
Мамадназар Раҳматшоев, роҳбари гурӯҳи саҳҳомон мутмаин аст, ки акнун ҳудуди 600 оила дар ниҳояти кор ба манзилҳои худ соҳиб мешаванд. «Мо муддати се сол дар ҳар гӯшае зиндагӣ карда, адолатро ҷӯё будем ва аз ноумедӣ рӯзи 3-юми июн ба гирдиҳамоӣ даст заданӣ будем, то ки ҳукуматдорон мушкилоти моро ҳал кунанд. Манзилҳои мо дар биноҳое ҷойгиранд, ки корҳои сохтмонӣ дар онҳо 80-90% ба иҷро расидааст. Қисмати боқимондаро мо бо қувваи худӣ ба итмом мерасонем ва барои ин шояд 3-4 моҳ лозим ояд», – зикр кард ӯ.
Аз замони боздошти собиқ раҳбари ширкати «Мовароуннаҳр» Ҷӯрабек Охунов тирамоҳи соли 2010, иншооти сохтмонаш нотамоми ширкат иборат аз 8 бинои баландошёна дар микрорайонҳои 82, 33 ва маҳаллаи Гипроземи пойтахт таҳти ҳабс қарор доштанд ва дар он корҳои сохтмонӣ қатъ гардида буданд.
Бино ба маълумоти Суди олии ҶТ, зарари умумии аз ҷониби ширкат расонидашуда 62 млн. сомонӣ ё худ 14 млн. доллари ИМА-ро ташкил медиҳад. Арзиши иншооти сохтмонаш нотамоми таҳти ҳабс қароргирифта хеле камтар аст.
Моҳи июли соли 2012 Суди олии Тоҷикистон раҳбари 53-солаи ширкати «Мовароуннаҳр» Ҷӯрабек Охуновро ба 14 соли зиндон бо мусодираи амвол маҳкум кард.
Охунов дар содир намудани ҷиноят мутобиқи ҳамаи моддаҳои пешниҳодшуда – ба қаллобӣ дар ҳаҷми ниҳоят зиёд, фаъолияти соҳибкории ғайриқонунӣ, расонидани зарар ба амвол тавассути фиреб ё суистеъмол аз боварӣ ва камомад гунаҳкор дониста шуд. Дар ҳамин ҳол, аз се як ҳиссаи муҳлати ҷазо мавриди афв қарор гирифта, муҳлати ҷазо аз замони боздошти Охунов – 9-уми ноябри соли 2010 ҳисоб мешавад.
