Чанде қабл шоири саршиноси тоҷик, дорандаи Ҷоизаи давлатии ба номи Рӯдакӣ дар бахши адабиёт Бозор Собир аз Иёлоти Муттаҳидаи Амрико ба ватан баргашт.
Бино ба иттилои шабакаҳои давлатии телевизиони Тоҷикистон, шоир муддати ду даҳсола дар ИМА иқомат дошта, охирин гурезаи ҷанги шаҳрвандист, ки ба ватан баргаштааст.
Дар фурудгоҳи пойтахт Бозор Собирро намояндагони Дастгоҳи иҷроияи сарвари давлат, дӯстону ҳамқаламон ва рӯзноманигорон пешвоз гирифтанд.
Дар мусоҳиба ба шабакаҳои телевизион шоир изҳор намуд, ки бо даъвати президент ӯ якумра ба ватан баргашта, ҳамчунин таъкид дошт, ки ҳоло ҳам дар рушди ҷомеа саҳмгир буда метавонад.
Бозор Собир аз зиёини кишвар даъват ба амал овард, ки атрофи сарвари давлат муттаҳид шаванд ва изҳори тааҷҷуб намуд, ки аҳзоби зиёди сиёсӣ барои Тоҷикистони кӯчак чӣ зарурате дорад.
«Дар Тоҷикистон аз ҳад зиёд авомфиребони нозарур пайдо шудаанд, ки бояд ҷояшонро ба нерӯҳои солимфикр диҳанд», – таъкид кард шоир.
