Субҳи имрӯз дар оташдонҳои махсуси Раёсати Агентии назорати маводи нашъаовари назди президенти Тоҷикистон дар вилояти Суғд беш аз 200 кило маводи мухаддир нобуд карда шуд.
Тавре аз Раёсати мазкур хабар доданд, аз 205 кило маводи мухаддири оташзада 139 килояшро маводи нашъаовари ҳашиш, 50 килояшро афюн ва зиёда аз 14 килояшро маводи сахттаъсири героин ташкил доданд.
Ба иттилои манбаъ, маводи мухаддири нобудшуда ба сифати далели шайъӣ дар 11 парвандаи ҷиноӣ истифода шуда, ҳукми суд нисбати онҳо мавриди амал қарор гирифтааст.
Зимнан зикр гардид, ки дар маросими нобудсозии маводи мухаддир ҳайати комиссияи махсус, намояндагони мақомоти ҳифзи ҳуқуқ ва рӯзноманигорон ҳузур доштанд.
