Аз 5-ум то 10-уми сентябр дар Душанбе анҷумани ҳаштуми ҷамъияти тоҷикон ва форсизабонони ҷаҳон баргузор мегардад.
Ба ин чорабинӣ намояндагони ҷамъиятҳои тоҷикон аз ҷамоҳири пасошӯравӣ, кишварҳои Осиё, Аврупо ва Амрико даъват шудаанд. Тавре як манбаи мӯътамад аз ҳукумати кишвар ба ОИ «Азия-Плюс» хабар дод, масъалаи омодагӣ ва баргузории анҷуман дар рафти ҷаласаи баргузоршудаи ҳукумати Тоҷикистон баррасӣ гардид.
«Меҳмонон ва иштирокдорони анҷуман аз тамоми манотиқи Тоҷикистон боздид карда, дар барномаи густардаи анҷумани мазкур ширкат меварзанд. Ғайр аз он, 9-уми сентябр вохӯрии онҳ бо президенти Тоҷикистон Эмомалӣ Раҳмон барномарезӣ шудааст»,-қайд намуд манбаъ.
Ба қавли ӯ, донишмандони машҳури тоҷик, сиёсатмадорон, соҳибкорону тоҷирон, намояндагони зиёиёни эҷодкор, ки дар хориҷи кишвар истиқомат доранд, аз ҷумлаи меҳмонони ин анҷуман маҳсуб мешаванд.
Ёдрас мекунем, ки анҷумани ҳафтуми ҷамъияти тоҷикон ва форсизабонони ҷаҳон сентябри соли 2008 дар Душанбе доир гардида буд. Раиси ҷамъият Эмомалӣ Раҳмон-президенти Тоҷикистон аст.
