Тоҷикистон дар Женева дар Кумитаи ҳуқуқи башари СММ доир ба равиши татбиқи Муоҳидаи байналмилалӣ дар бораи ҳуқуқҳои шаҳрвандӣ ва сиёсӣ гузориш медиҳад.
Тавре ба ОИ «Азия-Плюс» аз Дафтари ҳуқуқи башар ва риояи қонунияти ҶТ хабар доданд, Тоҷикистонро ҳайати васеъи ҳукуматӣ таҳти роҳбарии вазири адлия Рустам Менглиев, инчунин намояндагони ташкилотҳои ҳомии ҳуқуқи кишвар намояндагӣ мекунанд.
«Дафтари ҳуқуқи башар ва риояи қонунияти ҶТ бо дастгирии молиявии Шӯъбаи Ташкилоти байналҳалқии Институти «Ҷомеаи кушода-Бунёди мадад дар Тоҷикистон» 10-уми июл пахши мустақими видеоии баромади ҳукумати Тоҷикистонро бо гузориши миллӣ барпо мекунад. Пахши мустақим аз соати 13 то 15 ба вақти Душанбе дар маҷлисгоҳи маҷмааи «Гулистон-тур» бо нишонии шаҳри Душанбе, кўчаи Теҳрон, 21 баргузор мегардад»,- қайд карданд дар ин дафтар. Кулли хоҳишмандон метавонанд дар ин чорабинӣ иштирок кунанд.
Ёдрас мекунем, ки 8-уми июл дар Женева иҷлосияи 108-уми Кумитаи ҳуқуқи башари СММ ифтитоҳ ёфт. Дар ҷараёни ин иҷлосия гузоришҳои ҳукуматҳои Албания, Чехия, Финланд, Индонезия, Тоҷикистон ва Украина дар бораи вазъи ҳуқуқҳои сиёсӣ ва шаҳрвандӣ дар ин кишварҳо баррасӣ хоҳанд шуд.
Тавре Маркази ахбороти СММ иттилоъ медиҳад, иҷлосияи кунунӣ то 26-уми июл идома мекунад. Баррасии гузориши Украина ба 8-9-ум ва аз Тоҷикистон ба 9-10-уми июл ба нақша гирифта шудааст.
