Нимсолаи аввали соли равон аз ҷониби Суди олии иқтисодии ҶТ ду парванда бо иштироки ширкатҳои хориҷӣ баррасӣ шуд.
Зимни нишасти хабарӣ раиси Суди олии иқтисодии ҷумҳурӣ Наим Мансуров дар ин робита изҳор намуд, ки дар ин давра даъвои корхонаи муштараки «Таком Голд»-и Тоҷикистону Қирғизистон алайҳи ширкати чинӣ оид ба сармоягузорӣ ва рушди «Сзиан ЛТД» дар бораи бекор кардани шартномаи тиҷоратӣ миёни ҷонибҳо ва аризаи даъвогии КВД «Белтранс» (Минск) нисбат ба соҳибкори инфиродӣ дар бораи рӯёнидани беш аз 2,2 мл. $ ба фоидаи даъвогар баррасӣ ва рад карда шудааст.
«Айни замон боз чор парванда бо иштироки ширкатҳои хориҷӣ, аз ҷумла даъвои ҶДММ «Венстранстрой» (Маскав) дар бораи рӯёнидани беш аз 565 млн. сомонӣ аз ҶСК «НОБ Сангтӯда-1», даъвои корхонаи муштараки «Техноэнергокомплекс»-и Тоҷикистону Русия нисбат ба ҶДММ «Торговый дом Маниевский» ва ҶДММ «Проект»-и вилояти Ивановои Русия оид ба рӯёнидани зиёни моддӣ дар ҳаҷми ҳудуди 283 ҳазор $ ва аризаи даъвогии ҶСК «Межрегиональный Транзит Телеком» (Маскав) дар бораи рӯёнидани қарз дар ҳаҷми беш аз 2,7 млн. $ аз ширкати фароҳамсози Интернети «Сатурн-Онлайн»-и Тоҷикистон мавриди баррасӣ қарор дорад», – иброз дошт раиси Суди олии иқтисодии ҶТ.
Дар ҳамин ҳол, Мансуров таъкид дошт, ки аз ҷониби Суди олии иқтисодӣ ба Суди иқтисодии Душанбе аризаи даъвогии намояндаи ваколатдори Ҳасан Асадуллозода (раиси ҶСК «Ориёнбонк») нисбат ба шаҳрванди Қирғизистон Шербаков ва КМ «Таком Голд» ирсол шудааст, ки феълан баррасӣ мешавад.
