Чанде қабл дар Кохи Эгмонти шаҳри Брюссел сафири Тоҷикистон дар Шоҳигарии Белгия Рустамҷон Солиев дар ҷаласаи нахустин бахшида ба гузаронидани бозиҳои тобистонаи олимпии Аврупо-2014 таҳти сарпарастии Кумитаи байналмилалии олимпӣ ширкат варзид.
Бино ба иттилои Вазорати корҳои хориҷии ҷумҳурӣ, дар чорабинии мазкур муовини сарвазир, вазири корҳои хориҷии Шоҳигарии Белгия Дидйе Рейндерс раисӣ намуд. Гуфта мешавад, мақсад аз ҷаласа муҳокимаи тадорукоти гузаронидани бозиҳои тобистонаи олимпии махсуси Аврупо барои шахсони дорои имконияти маҳдуд дар Белгия 9-20 сентябри соли 2014 ба ҳисоб мерафт.
Зимни иҷлос эълон гардид, ки дар чорабиниҳои варзишии номбаргардида намояндагони 58 кишвари дунё дар мусобиқаҳо аз рӯи 10 намуди варзиш иштирок хоҳанд кард.
Ҳайати Тоҷикистон 15 нафарро дар бар мегирад ва тамоми хароҷоти иштироки варзишгарони Тоҷикистонро ҷониби Ҳукумати Белгия пардохт хоҳад намуд.
Дар рафти суҳбат сафири Тоҷикистон Р.Солиев ба Дидие Рейндерс ва роҳбарияти Кумитаи тадорукоти бозиҳои тобистонаи олимпии Аврупо-2014 барои даъвати ҳайати Тоҷикистон ва дастгирии иштироки варзишгарон миннатдорӣ баён кард.
