Дар ҷараёни рейдҳои бузургмиқёси кормандони мақомоти ҳифзи ҳуқуқи Русия дар як анбори бузурги нигаҳдории сабзавоти шаҳри Твер се нафар шаҳрвандони Тоҷикистон бидуни ҳуҷҷати иҷозати кор боздошт шуданд. Дар ин анбор беш аз 80 нафар муҳоҷирони кории тоҷик машғули коранд.
Тавре ба ОИ «Азия-Плюс» котиби матбуоти намояндагии Хадамоти муҳоҷирати Тоҷикистон дар Русия Иброҳим Аҳмадов хабар дод, дигар шаҳрвандони Тоҷикистон пас аз санҷиши ҳуҷҷатҳо ба кори худ идома бахшиданд.
Ба гуфтаи ӯ, кормандони намояндагӣ дар шаҳри Твер бо муҳоҷирони кории тоҷик як қатор вохӯриҳо гузаронида, дар робита ба пурзӯр шудани қонунгузории федералии Русия дар бахши муҳоҷират зарурати саривақт барасмиятдарории ҳуҷҷатҳои иҷозати будубошу кор ва риояи талаботи қонунгузории Русия дар ин самтро таъкид намуданд.
