Ҳамаи номзадҳо ба ҷуз президенти амалкунанда Эмомалӣ Раҳмон, ки ӯро шахси боэътимодаш намояндагӣ мекунад, субҳи имрӯз ба минтақаи Рашт раҳсипор шуданд.
Роҳбари дастгоҳи КМИР ҶТ Абдуманнон Додоев ба ОИ «Азия-Плюс» дар ин робита изҳор намуд, ки дар ин минтақа номзадҳо ҳамагӣ як вохӯрӣ баргузор мекунанд, ки он бо иштироки интихобкунандагони ноҳияҳои Рашт, Нуробод, Тоҷикобод, Тавилдара ва Ҷиргатол дар маркази маъмурии ноҳияи Рашт доир мегардад.
«Зимни мулоқот бо интихобкунандагони минтақаи Рашт номзадҳо интихобкунандагонро ба барномаи пешазинтихоботии худ шинос намуда, доир масоили сиёсӣ, вазъи иҷтимоиву иқтисодӣ ва дигар мушкилоти рӯзмарраи ҳаёти кишвар ибрози андеша мекунанд», – иброз дошт ӯ.
Ба иттилои манбаъ, чунин вохӯрӣ пагоҳ, 31-уми октябр бо интихобкунандагони ноҳияҳои Дарвозу Ванҷ доир гардида, рӯзи 1-уми ноябр номзадҳо бо интихобкунандагони шаҳри Хоруғ мулоқот мекунанд ва бо ҳамин вохӯрии номзадҳо ба мақоми президентӣ бо интихобкунандагон ба итмом мерасад.
Дар Тоҷикистон аз 16-уми октябр расман маъракаи пешазинтихоботӣ ба мансаби президентӣ оғоз гардид. Интихобот рӯзи 6-уми ноябр доир мегардад. Айни замон ба сифати номзад ба мақоми президенти Тоҷикистон расман 6 нафар ба қайд гирифта шуданд. Инҳо президенти амалкунандаи ҷумҳурӣ Эмомалӣ Раҳмон, намояндаи Ҳизби аграрӣ академик Толиббек Бухориев, раиси Ҳизби ислоҳоти иқтисодӣ Олимҷон Бобоев, муовини раиси Ҳизби коммунист Исмоил Талбаков, раиси Ҳизби сотсиалистӣ Абдуҳалим Ғаффоров ва раиси Ҳизби демократии Тоҷикистон Саидҷаъфар Исмонов мебошанд.
Бо қарори КМИР номзадҳо ба мансаби президентӣ ба суханронии 30-дақиқаинаи ройгон дар ҳар кадоме аз шабакаҳои давлатии телевизионӣ ҳуқуқ дошта, ба шахсони бовариноки номзадҳо низ дар ҳар кадоме аз шабакаҳои давлатии телевизионӣ 20 дақиқа эфир дода мешавад. «Ҳамчунин номзадҳо ҳуқуқ доранд, ки дар матбуотӣ расмӣ маълумот дар бораи барномаҳои пешазинихоботии худ дар ҳаҷми 10 саҳифаи чопӣ (шрифти 14)-ро низ ба нашр расонанд.
