Дар низоми бима (суғурта)-и тиббӣ Русия бимаи ҳатмии тиббӣ барои муҳоҷирни кории хориҷиро ҷорӣ месозад ва акнун бидуни суғуртаи тиббӣ ва ҳамчунин иҷозатнома барои кор ё патент, шаҳрванди хориҷӣ наметавонад дар қаламрави Русия доимо ё тибқи қарордоди корӣ ба фаъолият машғул шавад.
Тавре намояндаи расмии сафорати Тоҷикистон дар Русия Муҳаммад Эгамзод хабар дод, тағйироти воридмешуда ба Кодекси меҳнати Русия дар қисмати фаъолияти муҳоҷирон шаҳрвандони хориҷиро ба пешниҳоди санади суғуртаи ихтиёрии тиббӣ ба корфармо зимни имзои қарордод уҳдадор мекунад.
«Ин тағйирот талабот барои муҳоҷирон зимни бастани қарордодро сангинтар намуда, иҷозатномаи кор ё патент, иҷозат барои иқомати муваққатӣ вобаста ба мақоми маъмурӣ-ҳуқуқӣ ва бимаи ҳатмии тиббӣ низ акнун аз шартҳои асосии бастани қарордоди меҳнатӣ маҳсуб меёбанд», – иброз дошт ӯ.
Номбурда ҳамчунин зикр кард, ки барои шаҳрвандони хориҷие, ки камтар аз 6 моҳ қарордоди меҳнатӣ ба имзо мерасонанд, пешниҳоди санади бимаи нафақа ва ҳуҷҷатҳои бақайдгирии низомӣ ҳатмӣ нест. «Навгонии асосии лоиҳаи қонун – пешниҳоди санади бимаи тиббӣ ё шартномаи дахлдор дар бораи ба шаҳрванди хориҷӣ расонидани кӯмаки аввалияи тиббӣ зимни бастани қарордоди меҳнатӣ мебошад ва баррасии ин тағйирот дар музокироти умумӣ то 29-уми январ идома меёбад», – афзуд М.Эгамзод.
