Ҳафтаи гузашта раиси Ҳизби коммунисти Тоҷикистон Шодӣ Шабдолов дар кори конфронси навбатии ҳаракатҳои коммунистӣ ва коргарӣ дар шаҳри Лиссабон ширкат варзид.
Ба хабарнигори ОИ «Азия-Плюс» ӯ дар ин робита изҳор намуд, ки дар ин чорабинӣ намояндагони ҳаракат ва аҳзоби чапгарои беш аз 100 кишвари дунё иштирок карда, дар он атрофи роҳҳои раҳо ёфтани иқтисоди ҷаҳон аз буҳрони аллакай тӯли даҳсола идомадошта табодули назар сурат гирифт.
«Дар конфронс зикр гардид, ки аз пошхӯрии лагери сотсиалистӣ империализм худро озод ҳис намуда, дигар аз пролетариат ҳарос надорад ва ин бепарвоӣ ба буҳрони худи империализм оварда расонид. Бар асари буҳрон имрӯз синфи миёна барҳам хӯрда, намояндагони он ба сафи мардуми заҳматкаш (пролетариат) бипайвастанд», – гуфт Шабдолов.
Дар идома раиси ҲКТ қайд кард, ки зимни суханронӣ дар ин чорабинӣ ӯ таваҷҷуҳи ҳозиринро ба он ҷалб кардааст, ки дар бисёр кишварҳо буҳрони ҷаҳонӣ метавонад ба зуҳури фашизм, ифротгроии динӣ ва терроризм боис гардад.
«Кишварҳое, ки талаботи ҳаракатҳои чапгарои коргариро нодида мегиранд, ба шикаст дучор мешаванд. Чунин ҳодисаҳо дар Ироқ, Афғонистон ва Либия ба вуқӯъ пайвастанд. Ба туфайли дастгирии Русияву Чин ва синфи коргари ҷаҳон, Сурия ба он истодагарӣ карда тавонист», – муътақид аст Шабдолов.
Ба қавли раиси ҲКТ, ҳамоиши ҷаҳонии ҳаракатҳои чапгаро ва коргарӣ дар пойтахти Португалия ба ҳукуматҳои кишварҳо тавсия медиҳад, ки «ин қадр ба модели иқтисоди бозаргонӣ дода нашуда, ба иқтисоди тарҳрезишудаи давлатӣ бештар таваҷҷуҳ зоҳир намоянд».
Номбурда илова намуд, ки дар доираи ҳамоиш бо пешвоёни аҳзоби коммунисти Португалия, Баҳрайн, Покистон, Ҳиндустон ва Бангладеш дидору гуфтушунид кардааст.
