Дар Мақомоти иҷроияи маҳаллии ҳокимияти давлатӣ дар шаҳри Душанбе таҳти раёсати раиси пойтахт Маҳмадсаид Убайдуллоев ҷаласаи васеи кории шаҳрдорӣ баргузор гардид, ки дар ҷараёни он бо иштироки масъулини сохторҳои марбутаи шаҳрӣ масоили мубрами хоҷагидории пойтахт мавриди баррасӣ қарор дода шуд.
Бино ба иттилои хадамоти матбуоти мақомоти шаҳрдории пойтахт, юо дарназардошти мусоид омадани боду ҳаво, раиси шаҳр таваҷҷуҳи роҳбарони сохторҳои хизматрасонии коммуналӣ, нақлиёти мусофиркашонии ҷамъиятӣ ва раисони ноҳияҳои шаҳрро ба санҷиши омодабошӣ ва барориши саривақтии техникаҳои коммуналии барфтозакунандаву намакпошӣ дар роҳҳо ҷалб карда, дастур фармуд, ки ҳолати роҳандозии тадбирҳои озмоишӣ дар таносуби ҳар кадом сохторҳо ва ноҳияҳоро зери назорат қарор дода шаванд.
Дар иртибот ба ин ҳолати омодагиҳои фонди манзил, муассисаҳои иҷтимоӣ ва Муассисаи шабакаи гармидиҳандаи шаҳри Душанбе барои қабули гармии аз тарафи Ҷамъияти саҳомии навъи кушодаи «Маркази истеҳсоли барқу гармидиҳӣ» – и ШСХК “Барқи Тоҷик” дар мавсим пешниҳодшаванда, ба риштаи таҳлил аз ҷониби шаҳрдор кашида шуд ва зимнан аз муовинони соҳавии Раиси шаҳр ва роҳбарияти Маркази зикрёфта тақозо гардид, ки масъалаи дар муҳлатҳои тасдиқгардида аз ҷониби фармоишгар ба истифодадиҳии дегхонаи Ғарбиро зери назорат қарор диҳанд.
Раиси пойтахт таваҷҷуҳи ҳозиринро ҳамчунин ба масъалаи иҷрои талаботи қонун дар бораи манъи нигоҳдории чорво дар қаламрави Душанбе, риояи қоидаҳои беҳдошти ҳолати санитарию эпидемиологӣ дар шаҳр ва чораҳои зиддисӯхторӣ ҷалб намуда, дастур дод, ки дар ин самат тадбирҳои амалӣ андешида шаванд.
Бо нигаронӣ нисбати фаъолияти Маркази татбиқи Лоиҳаи “Идоракунии партовҳои сахти маишӣ дар шаҳри Душанбе” аз Прокуратураи шаҳр ва Агентии назорати давлатии молиявӣ ва мубориза бо коррупсия оид ба шаҳри Душанбе дархост шуд, ки дар ин ҷода ва аз ҳолати захираи маводи ниёзи аввалия барои мавсими зимистонгузаронӣ дар бозорҳои коммуналии шаҳр санҷишҳои мутақобиларо анҷом диҳанд.
