Бинобар сабаби сард шудани обу ҳаво ва боришот, алалхусус боридани борон ва барфи зиёд, ки дар шабонарӯзи 16,17 ва 18-уми декабр дар назар дошта шудааст, Вазири корҳои дохилӣ, генерал-лейтенанти милитсия Рамазон Раҳимов ба ҷузъу томҳои Вазорат, аз ҷумла Раёсати БДА, Сарраёсати хадамоти давлатии оташнишонӣ, Хадамоти «Муҳофиза»-и ВКД ва дигар воҳидҳо супориш дод, ки ҳолати омадабошӣ қарор дошта бошанд.
Бино ба иттилои сомонаи расмии ВКД ҶТ, дар супориши вазир таъмини бехатарии ҳаракати нақлиёт дар роҳҳо, рафъи офатҳои табиӣ, аз ҷумла фаромадани тарма, омадани сел, лағжиши сангу хок, сар задани сӯхтор ва ғайра таъкид шудааст.
Гуфта мешавад, хадамоти дахлдори вазорат вазифадор карда шудаанд, ки дар сурати рух додани ин гуна ҳодисаҳо ҳайати шахсии мақомоти корҳои дохилӣ дар ҷойҳо барои расонидани кӯмак ва бартараф намудани оқибати офатҳои табиӣ сафарбар карда шаванд.
