Кормандони мақомоти пулиси шаҳри Санкт-Петербурги Русия як шаҳрванди Тоҷикистонро, ки мавриди ҷустуҷӯи байнулмилалӣ қарор дошт, боздошт намуданд.
Бино ба иттилои хадамоти матбуоти Сарраёсати ВКД ФР дар шаҳри Санкт-Петербург ва вилояти Лениград, субҳи рӯзи 12-уми декабри соли равон зимни баргузории амалиёти фаврӣ-ҷустуҷӯӣ дар вокзали Ладога, кормандони пулис шаҳрванди 33-солаи тоҷикро, ки дар ватанаш ба содир намудани ҷиноят гумонбар дониста мешавад, дастгир ва ҷиҳати нигаҳдорӣ ба тавқифгоҳи муваққатии шуъбаи пулис овардаанд.
Гуфта мешавад, боздоштшуда шаҳрванди 33-солаи Тоҷикистон Умар Неъматов будааст, ки мавриди ҷустуҷӯи байнулмилалӣ қарор доштааст.
Зимнан зикр мегардад, ки боздоштшуда дар ватанаш ба содир намудани ҷиноят мутобиқи моддаи 307-и Кодекси ҷиноии ҶТ (Ташкили фаъолияти ташкилоти экстремистӣ (ифротгароӣ) гумонбар дониста мешавад. Ташаббускори ҷустуҷӯ Раёсати ВКД дар вилояти Хатлон зикр шудааст.
