Сокинони мавзеи наздимарзии Оқсойи вилояти Ботканди Қирғизистон, ки дар марз бо Тоҷикистон гирдиҳам омадаанд, талабҳои нав пешниҳод мекунанд.
Котиби матбуотии раиси шаҳри Исфара Иқбол Тешаев тариқи телефон ба ОИ «Азия-Плюс» дар ин робита иттилоъ дод, ки гуфтушунидҳои раиси шаҳри Исфара Даврон Зоҳидов ва дар маҷмӯъ намояндагони вилояти Суғд бо намояндагони сохторҳои ҳукуматии вилояти Ботканди кишвари ҳамсоя то нимаи шаби дирӯз сурат гирифта, субҳи имрӯз низ дубора идома ёфтанд. «Айни замон низ гуфтушунидҳои раиси шаҳр ва муовини аввали раиси вилоят Ҷумъабой Сангинов бо раҳбарияти вилояти кишвари ҳамсоя ҷарён дошта, ҷонибҳо роҳу воситахои раҳоӣ аз чунин вазъро баррасӣ мекунанд», – гуфт ӯ.
Ба қавли Тешаев, сокинони Қирғизистон далелҳои оварда ва машваратҳои раҳбарияти вилояташонро гӯш надода, нияти парокандашавӣ хам надоранд ва бобати таъҷилан барқарор кардани корҳои сохтмон дар роҳи мошингарди Оқсой – Тамдикро, ки тавассути мавзеи Бедаки ҷазирақаламрави Ворухи Тоҷикистон мегузарад, талаб доранд. «Сохтмони ин роҳ моҳи апрели соли ҷорӣ бо қарори Комиссияи байниҳукуматии Тоҷикистону Қирғизистон мутаваққиф шуда буд», – иброз дошт котиби матбуотӣ.
Номбурда ҳамчунин гуфт, он замон намояндагони ҳукуматҳои ҳарду ҷониб ба хулосаи ягона расида буданд, ки роҳи мазкур бояд баъди аломатгузории марзи давлатии Тоҷикистону Қирғизистон сохта шавад.
Ёдрас мекунем, ки рӯзи 17-уми декабр дар мавзеи Оқ-Сойи ноҳияи Ботканд, наздикии марзи Тоҷикистону Қирғизистон дар як сохтмони бинои бӯстонсарои мутааллиқ ба шаҳрванди Қирғизистон сӯхтор ба амал омад.
Сокинони мавзеъ шаҳрвандони Тоҷикистонро дар сар задани ин сӯхтор гумонбар дониста, дар ин робита шаҳрвандони ҳарду кишвар
роҳи мошингарди Исфара-Ворухро бастанд
ва аз ҳарду ҷониб издиҳоми иборат аз ҳудуди 200 нафар ба мушоҳида мерасид.
