Дар доираи семинари якмоҳа Муассисаи давлатии «Маркази миллии тестӣ» (ММТ) барои қабули довталабони шаҳри Душанбе тибқи низоми мутамаркази имтиҳоноти қабул 42 нафар масъулони сабт омода намуд. Низоми нави қабул ба макотиби олии кишвар моҳи июли соли равон расман ҷорӣ мешавад.
Бино ба маълумоти ММТ, семинари омӯзишӣ барои омода кардани масъулони сабт дар шаҳри Душанбе аз 4 то 7-уми феврал доир гардида, аз 11 то 14-уми феврал дар вилояти Суғд, аз 18 то 21-уми феврал дар вилояти Хатлон ва рӯзҳои 25-26-уми феврал дар ВМКБ низ ба ин монанд чорабиниҳо баргузор мешаванд.
«Аз шумори умумии иштирокчиёни семинар дар пойтахт аз рӯйи озмун 42 нафар масъулони сабти оянда, аз ҷумла 7 роҳбари нуқтаҳои сабт, 7 ёвари роҳбарони ин нуқтаҳо ва 28 масъули сабт интихоб шуданд, ки дар давраи оғози имтиҳоноти қабул ба кори мавсимӣ дар шаҳри Душанбе ва ноҳияи Рашт ба кор ҷалб карда мешаванд», – зикр карданд дар ММТ.
Ба гуфтаи иштирокчии ин чорабинӣ, сармутахассиси Раёсати маорифи шаҳри Душанбе Парвина Наҷмиддинова, Марказ ба ҳайси масъулони сабт онҳоеро интихоб намуд, ки дорои қобилияти хуби корӣ бо технологияҳои навтарин мебошанд, зеро маълумот дар бораи довталаб тавассути барномаи компютерии таҳияшуда ба заминаи маълумот ворид мегардад.
Зимнан зикр гардид, ки шурӯъ аз 1-уми март сабти довталабон дар саросари кишвар оғоз гардида, то 15-уми апрел идома меёбад.
