Шабонарӯзи гузашта кормандони Вазорати корҳои дохилии ҷумҳурӣ аз се ҳодисаи муомилоти ғайриқонунии маводи нашъаовар ҷилавгирӣ намуданд.
Бино ба иттилои маркази матбуоти ВКД ҶТ, аз ҷониби кормандони милитсия дар вилояти Суғд зимни гузаронидани чораҳои фаврӣ-ҷустуҷӯӣ сокини шаҳри Хуҷанд Абдуманон Исмоилови 43-сола дастгир карда шуда, ҳангоми кофтукови шахсӣ аз ӯ ба миқдори 1 килою 458 грамм маводи нашъадори «ҳашиш» ва 6,5 грамм маводи сахттаъсири «героин» дарёфт ва мусодира карда шудааст.
Ба иттилои манбаъ, ҳамчунин, зимни як амалиёти дигари фаврӣ Ҷаҳонгир Розиқови 26-сола, сокини ноҳия Ҷаббор Расулов бо 242 грамм маводи нашъадори «ҳашиш» боздошт шудааст.
Гуфта мешавад, зимни боздошти шаҳрванди 22-солаи Афғонистон Хайриддин валади Шералихон дар ноҳияи Рӯшони ВМКБ, аз ӯ ба миқдори 550 грамм маводи нашъадори «афюн» ва 3,5 грамм маводи сахттаъсири «героин» дарёфт ва мусодира карда шудааст.
Зимнан зикр мегардад, ки аз рӯйи далелҳои дар боло зикршуда парвандаҳои ҷиноӣ боз шуда, тафтиш идома дорад.
