Дастаи мунтахаби таэквондо ИТФ-и Тоҷикистон дар рӯзи аввали мусобиқаи қаҳрамонии Осиё дар Катмандуи Непал соҳиби 13 медал (4 тилло, 5 нуқра ва 3 биринҷӣ) гардид.
Бино ба иттилои сомонаи расмии Кумитаи миллии олимпии ҶТ бо такя ба гуфтаҳои Мирсаид Яҳёев, раиси Федератсияи таэквон-до ИТФ ва кикбоксинги Тоҷикистон, дар ин мусобиқаи қитъавӣ, ки миёни наврасону ҷавонон ва бузургсолон рӯзи якшанбеи 20-уми апрел шурӯъ шуд, варзишгарони 20 кишвар ширкат дошта, шарафи Тоҷикистонро 43 варзишгар ҳимоя мекунанд.
М. Яҳёев гуфтааст, дар рӯзи аввали мусобиқа дар рақобатҳои инфиродӣ оид ба машқҳои маҷмӯӣ Алишер Аҳмадов байни бузургсолон ва Гулрӯ Ҳоҷиева миёни духтарон бо медалҳои тилло сарфароз гаштанд . Инчунин мунтахаби Тоҷикистон дар сабқати дастаӣ байни писарон ва миёни духтарон ду медали тилло гирифтааст. Мусобиқаи мазкур дар пойтахти Непал то рӯзи 23-юми апрел идома хоҳад кард.
Гуфта мешавад, ин мусобиқа барои варзишгарони ҷавони тоҷик як навъ санҷишест пеш аз мусобиқаи қаҳрамонии ҷаҳон оид ба таэквон-до ИТФ байни наврасон, ки аз 6-ум то 11-уми августи соли равон барои аввалин бор дар шаҳри Душанбе барпо мегардад.
