Чанде қабл Кумитаи ҳолатҳои фавқулода ва мудофиаи гражданӣ (КҲФ ва МГ)-и назди ҳукумати Тоҷикистон 50 нафар сарбоз 5 нафар афсар аз гарнизони пойтахтро барои бартараф кардани оқибатҳои офати табиӣ ба ҷамоати Зайнабободи ноҳияи Рӯдакӣ сафарбар намуд. Дар ин бора ба «Азия-Плюс» сардори КҲФ ва МГ ҷумҳурӣ Ориф Нозимов хабар дод.
Ба гуфтаи ӯ, раҳбарияти кумита назди сарбозону афсарон вазифа гузоштааст, ки то шоми пагоҳ поксозии таҳхонаҳои сокинони маҳаллӣ аз лойқаи селро ба итмом расонида, ба аҳолии маҳаллӣ дар барқарор кардани қитъаҳои заминҳои наздиҳавлигиашон кумаку мусоидат намоянд.
Қобили зикр аст, ки бар асари боришоти шадиди рӯзи 10-уми май дар ноҳияи Рӯдакӣ ба беш аз 400 манзили зист зарар расонида шуд.
