Маҳмадулло Холови аввали соли равон барои таҷовуз ба номуси духтарони ӯгаяш гумонбаршуда дар тавқифгоҳи муваққатӣ (СИЗО)-и шаҳри Хуҷанд аз олам даргузашт.
Бино ба иттилои Олимҷон Сайдалиев, сардори тавқифгоҳи муваққатии Хуҷанд, Маҳмадулло Холов ҳанӯз 9-уми май фавтида, сабаби марги ӯро коршиносони ташхиси судӣ-тиббӣ сактаи дил (инфаркт) унвон кардаанд. «Ахиран ӯ бисёр гиря карда, аз шарманда шуданаш назди мардум барои кирдори содиркардааш таассуф мехӯрд. Ӯ аз кардааш пушаймон буд. Ман бори нахуст шоҳиди онам, ки шахс аз таассуфу андӯҳ ҳалок шуда метавонистааст», – гуфт ӯ.
Ёдрас мекунем, ки рӯзҳои 7-8-уми феврали соли ҷорӣ тариқи шабакаҳои давлатии телевизиони ҷумҳурӣ сюжети таҳияшудаи КДАМ ҶТ намоиш дода шуд, ки дар он дар бораи аз ҷониби табиби мардумӣ Холов М.И. аз вилояти Суғд содир шудани таҷовуз ба номуси духтарони ӯгаяш сухан мерафт. Боздоштшуда ба гуноҳаш иқрор шуда, чӣ гуна содир кардани ин кирдори нафратоварашро ҳикоят кард.
Ҳамчунин дар сюжет зикр карда шуда буд, ки боздоштшуда узви Ҳизби наҳзати исломии Тоҷикистон аст. Баъдан ҲНИТ дар ин робита як изҳороте пахш намуда, маълумот дод, ки Маҳмадулло Холов ҳеҷ гоҳ дар сафи ин ҳизб шомил набуда, ин амал идомаи «маъракаи зиддинаҳзатӣ»-и бофташуда аз ҷониби сохторҳои қудратӣ аст.
