Аз майдони умумии 199,4 ҳазор гектари пешбинишуда барои кишти пунбадона дар Тоҷикистон, соли ҷорӣ майдони кишти пунбадона 182 ҳазору 778 гектарро ташкил дод.
Аз Вазорати кишоварзии ҷумҳурӣ ба «Азия-Плюс» дар ин робита иттилоъ доданд, ки поинравии нархи нахи пахта дар бозори ҷаҳонӣ ба сол то сол кам шудани майдони кишти пахта дар Тоҷикистон боис мегардад ва деҳқонон асосан ба кишти сабзавоту боғпарварӣ афзалият медиҳанд.
Ба иттилои манбаъ, пахтакорони вилояти Хатлон дар майдони 129 ҳазору 65 гектар, вилояти Суғд – 54 ҳазору 354 гектар ва ноҳияҳои тобеи марказ – 5 ҳазору 359 гектар кишти пунбадонаро ба итмом расониданд.
«Сабаби коҳиши майдони кишти пунбадона ба супориши ҳукумати кишвар оид ба афзоиши майдони кишти сабзавоту мева ва маҳсулоти хӯроки чорво низ марбут аст, ки барои таъмини мунтазами аҳолии пойтахт ва ноҳияҳои наздики он бо маҳсулоти кишоварзӣ ва гӯшту шир пешбинӣ шудааст», – шарҳ доданд дар Вазорати кишоварзӣ.
Тибқи маълумоти расмии оморӣ, соли 2013 кишоварзони Тоҷикистон 392 ҳазор тонна ҳосили пахта ҷамъоврӣ намуданд, ки 96,4%-и нақшаи пешбинишударо ташкил дод. Соли 2013 майдони кишти пахта коҳиш ёфта, пунбадона дар майдони 191 ҳазору 333 гектар кишт шуд, ки нисбат ба соли 2012 ба миқдори 8 ҳазору 133 гектар камтар буд.
Ҳанӯз 10 сол қабл дар сохтори маҳсулоти содиротии Тоҷикистон пахта дар ҷойи аввал қарор дошт, вале тадриҷан ҳиссаи он дар содирот коҳиш меёбад. Масалан, соли 2012 ҳиссаи нахи пахта дар ҳаҷми умумии маҳсулоти содиротии Тоҷикистон 18,6% ва аз рӯи натиҷаҳои соли 2013 бошад, 10-15%-ро ташкил дод.
