Раиси Маҷлиси миллии Маҷлиси олии Тоҷикистон, раиси шаҳри Душанбе Маҳмадсаид Убайдуллоев субҳи имрӯз бо даъвати сенати Фаронса бо як ҳайати кишвар ба Фаронса сафар кард.
Тавре ба «Азия-Плюс» ёвари раиси пойтахт Шавкат Саидов хабар дод, зимни сафар Убайдуллоев аз ширкати фаронсавии «Итрон Франс», ки дар бозори ҷаҳонӣ бо истеҳсоли таҷҳизоти обҳисобкунакҳо маъруф аст, боздид намуда, бо раиси ширкат Паскал Мишодел дидору гуфтушунид мекунад. «Дар вохӯрӣ масъалаи таъсиси корхонаи муштараки истеҳсол ва таъмири обҳисобкунакҳо дар шаҳри Душанбе дар маркази таваҷҷуҳ қарор хоҳад гирифт», – иброз дошт ӯ.
Ба иттилои манбаъ, сафари Маҳмадсаид Убайдуллоев ба Фаронса то 13-уми июн идома меёбад. Дар доираи сафар Убайдуллоев бо раиси сенати Фаронса Жан Пйер Бел, сенаторон Андре Дюл, раиси гурӯҳи байнипарлумонии дӯстии «Фаронса – Осиёи Марказӣ», Ив Поззо де Борг мовини раиси гурӯҳи дӯстии Фаронса ва Тоҷикистон низ дидору гуфтушунид карда, масоили густаришу таҳкими муносибатҳои байнипарлумониро баррасӣ мекунад.
