Дар назди сафоратхонаи Британияи Кабир дар Тоҷикистон пикети ғайриқонунӣ баргузор шуда, бо боздошти якчанд нафар хотима ёфт.
Тавре ба «Азия-Плюс» шоҳидони воқеъа хабар доданд, ин амал аз ҷониби панҷ нафар зан сурат гирифта, онҳо ба сӯйи бинои сафоратхона сангу шиша партофтаанд.
«Вақте посбонони бинои сафоратхона кӯшиш кардаанд, ки ба ин амали онҳо монеъ шаванд, чор нафар мардон ҳам ба занҳо ҳамроҳ шудаанд. Мардон посбононро лату кӯб карда, занон ба сангу шишапартойӣ ба бинои сафоратхона идома доданд», – гуфтанд шоҳидони ҳодиса.
Ба қавли шоҳидон, онҳо бахубӣ нафаҳмидаанд, ки ин нафарон чӣ талабе доштанд, вале чанд маротиба калимаи «Помир»-ро шунидаанд.
Тақрибан баъди ним соат кормандони милиса ба назди бинои сафоратхона ҳозир шуда, ҳамаи иштирокчиёни пикетро боздоштаанд.
Дар сафоратхонаи Британияи Кабир далели ҳамла ба бинои намояндагии дипломатиро тасдиқ намуда, зикр карданд, ки ояндаи наздик дар ин бора иттилои расмӣ омода мешавад.
