Шаби 9 ба 10 июн аз тарафи кормандони Раёсати Агентии назорати маводи нашъаовари назди Президенти ҶТ дар вилояти Хатлон дар якҷоягӣ бо хизматчиёни ҳарбии Отряди сарҳадии “Панҷ”-и Саррёсати Қӯшунҳои сарҳадии Кумитаи давлатии амнияти миллии ҶТ кӯшиши интиқоли миқдори калони маводи нашъаовар ба ҳудуди Тоҷикистон пешгирӣ карда шуд.
Бино ба иттилои сомонаи расмии Агентӣ, дар яке аз минтақаҳои дидбонгоҳи сарҳадии “Шуркул” ҳангоми интиқоли маводи нашъаовар задухӯрди мусаллаҳ ба вуқӯъ пайваст, ки дар натиҷаи он яке аз қочоқбарон – Ғаффор валади Абдуғафури 45-сола – сокини вулусволии Имом Соҳиби вилояти Хатлон безарар гардонида шуд. Ҳаммаслаки ӯ бо номи Абдулло аз торикии шаб истифода бурда, ба самти Афғонистон фирор намуд.
Гуфта мешавад, субҳи рӯзи дигар ҳангоми азназаргузаронии ҷои ҳодиса ҷасади шаҳрванди Афғонистон, як адад камони шикории қутраш 12 мм, як адад борхалтаи полиэтиленӣ дарёфт карда шуд, ки дар дохили он 35 баста бо ҳашиш бо вазни зиёда аз 13 кг ва 3 баста бо героин бо вазни тахминан 3 кг мавҷуд буд.
Зимнан зикр мегардад, ки аз рӯи ҳодисаи мазкур парвандаи ҷиноӣ оғоз гардида, тафтишот идома дорад.
