Раёсати тандурустии вилояти Хатлон таи чанд моҳи охир бе роҳбар буд ва ахиран ба ҷои сардори барканоршудаи ин идора Шералӣ Бузмаков, бародари ӯ (писарамакаш) Сайдулло Маллаев омад.
Шералӣ Бузмаков, ки дар симати сардори раёсати тандурустии вилояти Хатлон наздик ба 7 сол нишаста буд ,моҳҳои аввали соли равон аз вазифа барканор шуд. Номбурда баъди эродҳои зиёде дар фаъолияти идораи тандурустӣ аз тарафи раиси вилоят Давлатшо Гулмаҳмадов бо курсиаш падруд гуфт.
Дар ин чанд моҳи бесардории идораи тандурустӣ, коршиносону мутахассисони соҳа ҳадс мезаданд, ки номзад ба ин вазифаи пурмасъул хеле зиёдасту ҳатто дар байни онҳо номзадии як зан ҳам вуҷуд дорад. Яке мегуфт, ба ин вазифа сардухтури беморхонаи ноҳияи Данғара меояду дигаре мегуфт, ки сардор ин дафъа аз беруни вилоят шояд таъин шавад. Аммо касе ҳатто фикр намекард, ки бародари собиқ сардор ба ин маснад менишинад.
Инак, ҳафтаи гузашта Сайдулло Маллаевро ба ҳайати кормандони идораи тандурустии вилоят ба ҳайси сардори идора шинос намуданд.
Бояд гуфт, ки Сайдулло Маллаев бародарзодаи собиқ сардори идораи тандурустии вилоят ва ҳоло сардори ин идора, то таъин ба вазифаи наваш дар вазифаи сардухтури беморхонаи марказии ноҳияи Ҷиликӯл адои вазифа мекард.
