Президенти Ҷумҳурии Тоҷикистон Эмомалӣ Раҳмон бинобар сабаби даргузашти собиқ президенти Гурҷистон Эдуард Шеварднадзе ба президенти ин кишвар Георгий Маргвелашвили барқияи тасаллият ирсол намуд.
Бино ба иттилои хадамоти матбуоти сарвари давлат, дар барқияи тасаллияти Эмомалӣ Раҳмон таъкид мегардад, ки ҳарчанд таърих чандин пурпечутобҳои зиндагиро пеш оварда бошад ҳам, Эдуард Шеварднадзе дар он ҳамчун як чеҳраи барҷаста, арбоби сиёсии муосири ҳамон давра боқӣ мемонад.
«Хизматҳои марҳум аз ҷониби халқи Гурҷистон қадр гардидаанд, зеро ӯ дар ин кишвар, замоне роҳбарӣ мекард, ки дар он давра марҳилаи хеле вазнин буд», – зикр мегардад дар барқияи сарвари давлати Тоҷикистон.
Дар фарҷоми барқия Эмомалӣ Раҳмон аз президенти Гурҷистон хоҳиш мекунад, ки ҳамдардии самимиашро ба мардуми Гурҷистон ва наздикону пайвандони марҳум бирасонад.
