Дар доираи чорабиниҳо оид ба пешгирии нашъамандӣ ва паҳншавии маводи нашъаовар кормандони Раёсати Агентии назорати маводи нашъаовари назди президенти ҶТ дар ВМКБ дар лагери истироҳат ва солимии «Шабдез»-и ноҳияи Роштқалъа бо кӯдакон мулоқот оростанд.
Бино ба маълумоти маркази робита бо ҷомеаи Агентӣ, кормандон ба кӯдакон бо тарзи фаҳмову дастрас дар бораи таъсири манфӣ ва зараровари маводи нашъаовар ба ҷисми ҳанӯз комилан ташаккулнаёфтаи онҳо маълумоти муфассал доданд.
«Ҳадафи аслӣ аз баргузории чунин чорабиниҳо таблиғи тарзи ҳаёти солим, яъне ҳаёт бидуни маводи нашъаовар сарфи назар аз синнусол, ҳолати маънавӣ ва моддии шахс аст. Зимни мулоқот кӯдакон оид ба масъалаҳои мавриди таваҷҷуҳашон оид ба ин мушкилот саволҳо дода, посухи қаноатбахш гирифтанд», – гуфтанд дар Агентӣ.
Зимнан зикр гардид, ки дар фарҷоми вохӯрӣ викторина баргузор шуда, ба иштирокчиёни фаъоли он туҳфаҳои хотиравии Агентӣ тақдим гардиданд.
