Зимни мулоқоти корманди намояндагии Вазорати меҳнат, муҳоҷират ва шуғли аҳолии Тоҷикистон дар Русия оид ба муҳоҷират бо директори ҶДММ «Стройпромет»-и вилояти Маскав директори ин ширкат Павел Бабанин изҳор намудааст, ки корхонааш мутахассисони бинокори тоҷикро ба кор даъват мекунад.
Тавре ба «Азия-Плюс» сухангӯи намояндагии Вазорати меҳнат, муҳоҷират ва шуғли аҳолии Тоҷикистон дар Русия Иброҳим Аҳмадов хабар дод, кормандони намояндагӣ аз комплекси сохтмониву истеҳсолии ин корхона боздид намуда, бо шароити кор ва будубоши коргарон шинос шуданд.
«Маълум шуд, ки дар ин ширкат беш аз 15 нафар муҳоҷирони меҳнатии тоҷик машғули кор буда, ҳамаашон бо манзили зист, шароити хуби корӣ ва ҳуҷҷатҳои зарурии будубошу фаъолият дар қаламрави Русия таъминанд», – гуфт вай.
Ба гуфтаи ӯ, зимни вохӯрӣ қайд шудааст, ки ҳамаи кормандон софдилона меҳнат карда, саривақт уҳдадориҳои меҳнаташонро ба иҷро мерасонанд ва инро дар суҳбат худи муҳоҷирон низ тасдиқ намуда, изҳор доштаанд, ки шароити кор ва будубошашон хуб буда, сарвақт музди меҳнаташон пардохта мешавад.
Зимнан зикр гардид, ки аз рӯи натиҷаҳои вохӯрии мазкур миёни намояндагии Вазорати меҳнат, муҳоҷират ва шуғли аҳолии Тоҷикистон дар Русия ва ин корхона дар бораи ҳамкории минбаъда бобати бо ҷойи корӣ таъмин намудани шаҳрвандони тоҷик шартнома ба имзо расидааст.
