Бо дастгирии ташаббуси Вазорати кишоварзии ҷумҳурӣ, раиси шаҳри Душанбе Маҳмадсаид Убайдуллоев дар бораи рӯзи 30-юми август дар пойтахт баргузор намудани иди ҳамасолаи асал ва харбуза қарор ба имзо расонид.
Бино ба итиилои мақомоти шаҳрдории пойтахт, ин чорабинӣ аз соати 7-и субҳ то 18-и шомгоҳон дар бозорҳои нисбатан бузурги маҳсулоти ғизойии пойтахт – «Шоҳмансур», «Саховат», «Қарияи боло» ва «Деҳқон» баргузор мешавад.
Ба иттилои манбаъ, раиси пойтахт ҷиҳати дар сатҳи зарурӣ баргузор кардани ин чорабинӣ ба сохторҳои марбута, раисони ноҳияҳо ва мақомоти ҳифзи ҳуқуқи пойтахт дастуру супоришҳои дахлдор додааст.
Дар ин бозорҳо ба харидорон навъҳои беҳтарини асал ва харбуза пешкаш гардида, маъмулан навъҳои дигари маҳсулоти кишоварзӣ низ бо нархҳои нисбатан арзон ба фурӯш бароварда мешаванд.
Бино ба маълумоти Корхонаи воҳиди давлатии «Асали тоҷик», нимсолаи аввали соли ҷорӣ дар кишвар беш аз 500 тонна асал истеҳсол шудааст.
Қобили зикр аст, ки соли гузашта дар ин чорабинӣ дар пойтахт занбӯриасалпарварони ҷумҳурӣ зиёда аз 115 тонна асал ва зироаткорон зиёда аз 187 тонна навъҳои гуногуни харбузаи хуштамъу болаззатро пешкаши меҳмонон ва сокинони пойтахт гардонида буданд.
Гуфта мешавад, дар баробари асал ва харбуза инчунин дигар маҳсулоти кишоварзӣ дар ҳаҷми 230 тонна, аз ҷумла тарбуз, картошка, пиёз, помидор, бодиринг, сабзӣ, каду, себ, нок, боймиҷон, шарбати мева, гӯшт ва тухм ба фурӯш гузошта шуд. Маҳсулотҳои зикргардида нисбати нархҳои бозор ба андозаи 20-30 фоиз арзон ба фурӯш бароварда шуда буд.
