Раиси бахши Ҳизби наҳзати исломии Тоҷикистон дар ноҳияи Шӯроободи вилояти Хатлон Мадисо Ҷалиловро мкақомоти андози ноҳия ба маблағи 12 ҳазор сомонӣ ҷарима бастанд. Дар ин бора ба «Азия-Плюс» тариқи телефон худи ҷабрдида М.Ҷалилов хабар дод.
Ба гуфтаи ӯ, имрӯз кормандони мақомоти андози ноҳия ва иҷрочии суд ба хонааш омада, ҳарчи зудтар пардохт намудани маблаги ҷаримаро талаб кардаанд.
«Бинобар сабаби гӯё аз ҷониби ман истифода шудани манзилам ба сифати дафтари кории бахши ҳизб, қаблан маро ҷарима кардаанд, ки ман бо ин қатъиян розӣ нестам. Мақомоти андоз мегӯянд, ки барои ба сифати дафтари кории ҳизб истифода кардани хонаам, ман бояд сертификат гирифта, андозҳоро пардохт мекардам, вале ҲНИТ дар Шӯрообод дафтари корӣ надорад ва ман ҳеҷ гоҳ манзиламро ба сифати дафтари кории ҳизб истифода накардаам», – қайд кард Ҷалилов.
Номбурда ҳамчунин зикр кард, ки ҳодисаи мазкур низ яке аз қисматҳои маъракаест, ки ҳукуматдорон алайҳи ҲНИТ роҳандозӣ кардаанд.
