Бар асари садамаи нақлиёти рӯзи душанбеи ҳамин ҳафта дар минтақаи шиомли ҷумҳурӣ, 4 нафар ба ҳалокат расиданд, ки 2 нафарашон ноболиғонанд.
Тавре аз Раёсати ВКД Тоҷикистон дар вилояти Суғд хабар доданд, зимни ҳаракат дар қаламрави шаҳраки Яхтан ронандаи 33-солаи автомашинаи «Мерседес» Нуралӣ Шодимуродов аз уҳдаи идораи воситаи нақлиёт набаромада, автомашина чаппа мешавад, ки дар натиҷа ронанда бо ҷароҳатҳои вазнин дар беморхона бистарӣ ва писари 8-солаи ӯ Шодимуродов Рустам дар роҳ ба бемористон ба ҳалокат расидааст.
Ба иттилои манбаъ, садамаи нақлиёти дуюм дар роҳи Сомғор-Хуҷанд ба вуқӯъ пайваста, ронандаи 52-солаи автомашинаи тамғаи «Мерседес» Миршоев Раҷаб бехатарии ҳаракати воситаи нақлиётро таъмин карда натавониста, бо автомашина роҳгузари 69-сола Муҳсинов Музаффарро пахш мекунад, ки дар натиҷа ӯ дар ҷойи ҳодиса ҳалок шудааст.
Худи ҳамон рӯз ронандаи 27-солаи автомашинаи тамғаи «БМВ» Азизов Мазрафҷон дар деҳаи Оббурдон аз уҳдаи идораи воситаи нақлиёт набаромада, ба автомашинаи тамғаи «ВАЗ-2101» таҳти идораи Асрор Ҳусейнови 33-сола бармехӯрад. Дар натиҷа ронандаи автомашина ва мусофирони он – Далер Ҳусейнови 10-сола, Абдиев Дилшоди 13-сола, Ҳусейнова Бибиназари 4-сола ва Абдиева Азизмоҳи 47-сола ҷароҳатҳои вазнини ҷисмонӣ бардошта, ба бемористон мунтақил мешаванд. Баъди чанде Д.Абдиеви 13-сола дар бемористон ба ҳалокат мерасад. Ронандаи «БМВ» М.Азизов бо ҷароҳатҳои вазнин ба бемористон оварда шуда, Фирӯза Сулаймоноваи 34-сола аз ҷароҳатҳои вазнин дар бемористон ҳалок шудааст.
Бино ба иттилои Шуъбаи БДА-и Раёсати ВКД Тоҷикистон дар вилояти Суғд, давоми 9 моҳи соли ҷорӣ дар роҳҳои мошингарди вилоят 257 ҳодисаи садамаи нақлиёт (ҳамин давраи соли 2013 – 240 ҳодиса) рух дода, бар асари он 87 нафар ҳалок (соли 2013 – 111 нафар) ва 274 нафар (соли 2013 – 245 нафар) ҷароҳатҳои гуногуни ҷисмонӣ гирифтаанд.
Дар ин давра бо иштироки кӯдакон 62 ҳодисаи садамаи нақлиёт (соли 2013 – 65 ҳодиса) ба қайд гирифта шуда, дар натиҷа 19 нафар ҳалок (соли 2013 – 19 нафар) ва 51 нафар кӯдакон (соли 2013 – 50 нафар) ҷароҳатҳои ҷисмонӣ бардоштанд.
