Ахири ҳафтаи сипаришуда дар ҷаласаи Пленарии Гурӯҳи татбиқи чораҳои молиявии муқовимат ба шустани пул (ФАТФ) дар Париж (Фаронса) оид ба баланд бардоштани мавқеъи Тоҷикистон дар ин самт қарор қабул шуд.
Бино ба иттилои хадамоти матбуоти Бонки миллии Тоҷикистон (БМТ), тибқи ин қарор, бинобар пурра мутобиқ гардидани қонунгузории Ҷумҳурии Тоҷикистон ба Тавсияҳои Гурӯҳи татбиқи чораҳои молиявии муқовимат ба шустани пул (ФАТФ) ва мавриди амал қарор гирифтани онҳо, Тоҷикистон аз реҷаи мониторинг бароварда шуда, ба қатори кишварҳое, ки комилан ба талаботҳои ин ташкилот ҷавобгӯ ҳастанд ворид карда шуд.
«Қабули ин қарор мавқеъи сармоягузории кишварро беҳтар намуда, имкониятҳои иловагиро барои рушди иқтисодию иҷтимои мамлакат фароҳам меорад», – гуфта мешавад дар хабари БМТ.
Гурӯҳи татбиқи чораҳои молиявии муқовимат ба шустани пул (ФАТФ, англисӣ – Financial Action Task Force on Money Laundering — FATF) созмони байниҳукуматиест, ки ба таҳияи меъёрҳои ҷаҳонӣ дар бахши муқовимат ба даромадҳои бо роҳи ҷинояткорӣ ба дастомада ва маблағгузории терроризм машғул буда, ҳамчунин ба мутобиқати низоми миллии кишварҳо ба ин меъёрҳо баҳогузорӣ мекунад.
Айни замон 34 кишвари дунё ва 2 созмони байнулмилалӣ ба ин ташкилот шомил буда, боз 20 созмон ва 2 кишвари дигар нозир мебошанд.
Тоҷикистон узви ин ташкилот нест, вале дар доираи Гурӯҳи авруосиёӣ оид ба муқовимат бо қонунигардонии даромадҳои бо роҳи ҷинояткорӣ бадастомада ва маблағгузории терроризм бо ин ташкилот ҳамкорӣ мекунад, ки ба ҳайати ин Гурӯҳ кишварҳои Беларус, Ҳиндустон, Қазоқистон, Чин, Қирғизистон, Русия, Тоҷикистон, Туркманистон ва Ӯзбекистон шомиланд.
