Раиси Ҳизби наҳзати исломии Тоҷикистон Муҳиддин Кабирӣ дар кори конфронси байнулмилалӣ таҳти унвони «Назари уламои ислом дар бораи гурӯҳҳои ифротиву такфирӣ», ки рӯзҳои 23-24-уми ноябр дар Эрон доир гардид, ширкат варзид.
Бино ба иттилои сомонаи расмии ҲНИТ, зимни суханронӣ дар конфронс Муҳиддин Кабирӣ таваҷҷуҳи ҳозиринро ба он ҷалб намуд, ки имрӯз дар бораи ифротгароии гурӯҳҳои мусаллаҳи ошкор зиёд ҳарф мегӯянд, аммо ифротгароӣ дар адабиёт, мавъизаҳо, хутбаҳо ва навору дискҳо нодида гирифта мешавад, ҳол он, ки маҳз ифротгароии фикрӣ ва андешаӣ боиси пайдоиши ифротгароии мусаллаҳ ва такфир мегардад.
Дар ҳамин ҳол, ӯ аз пешвоёни ҷаҳони ислом даъват кард, ки ҳангоми таълиф, мавъиза ё дарс аз сохтани зеҳнияти манфӣ нисбати дигар мусалмонон ва пайравони адёни дигар парҳез кунанд, то аз натиҷаи имрӯза пешгирӣ карда шавад.
«Ҷавонони мусалмон аз як тараф зери фишори низомҳои худкомаи дунявӣ ва аз тарафи дигар таҳти фишори доираҳои иртиҷоъии динӣ қарор доранд ва маҳдудиятҳои сиёсӣ, иқтисодӣ, динӣ ва маҳрумият аз як зиндагии бо шарофату бокаромат онҳоро дар ҳолати интиқомгирӣ аз ҳаёт ва атрофиён қарор додааст, – иброз доштааст раиси ҲНИТ. – Имрӯз онҳо аз ҳамаи мо, сиёсатмадорон, уламо, давлатмадорон, ки ояндаи равшану умедворкунандаи онҳоро рабудаем, интиқоди худро бо ҳамин васила мегиранд.
Ҳамчунин Муҳиддин Кабирӣ таъкид доштааст, ки «то он вақте ки олами ислом дар шароити истибдоди сиёсӣ мазҳабӣ, фасоди идорӣ ва молӣ, фақрӣ ва иқтисодиву маънавӣ қарор дорад, мо ҳамеша мушкилии ифротгароиву такфирро хоҳем дошт».
