Роҳбари дастгоҳи Комиссияи марказии интихобот ва раъйдиҳӣ (КМИР)-и Тоҷикистон Абдуманнон Додоев изҳори итминон кард, ки дар интихоботи парлумонии моҳи феврали соли оянда шабакаҳои телевизиони давлатӣ барои номзадҳо ба вакилӣ бештар дастрас мешаванд.
Ба гуфтаи вай, мутобиқи тағйироту иловаҳои нав ба қонунгузории интихоботи ҷумҳурӣ, аҳзоби сиёсӣ бо 40 дақиқа эфири бепули телевизионӣ таъмин мегарданд ва ин ҳам дар ҳолест, ки дар интихоботи парлумони соли 2010 онҳо бо 30 дақиқа эфири ройгони телевизионӣ таъмин шуда буданд.
«Барои номзадҳо ба вакилӣ дар парлумон аз ҳавзаҳои интихоботии якмандатӣ ба ҷойи 15 дақиқа дар интихоботи пешин 20-дақиқагӣ эфири ройгони телевизонӣ ҷудо мегардад», – таъкид дошт Додоев.
Намояндаи КМИР Тоҷикистон ҳамчунин зикр кард, ки дар саҳифаҳои нашрияҳои чопии ҳукумат барномаҳои пешазинтихоботии аҳзоби сиёсии ҷумҳурӣ ба чоп мерасанд, ки бояд матни он бо шрифти 14 ва фосилаи 1,5 пешниҳод гардад.
