Бонки миллии Тоҷикистон (БМТ) барои дар сатҳи устувор нигаҳ доштани қурби арзи миллӣ – сомонӣ баланд бардоштани иқтидори содиротии мамлакатро зарур медонад.
Дар посух ба саволҳои хабарнигори рӯзномаи «Ҷумҳурият» намояндагони БМТ дар ин робита изҳор намудаанд, ки «барои муътадил ва устувор нигоҳ доштани қурби пули миллӣ дар баробари давом додани сиёсати имрӯзаи қурбӣ, андешидани чораҳои дигар, аз қабили зиёд намудани истеҳсоли молҳои босифату дар бозорҳои ҷаҳонӣ рақобатпазир ва баланд бардоштани иқтидори содиротии мамлакат зарур аст».
Ғайр аз ин, дар БМТ бар ин назаранд, ки «зарур аст, ки дар сиёсати берунии иқтисодии кишвар, бахусус дар бахши ҳимояи истеҳсолкунандагони ватанӣ ва дар робита ба маҳдуд кардани воридоти молҳои хориҷие, ки дар дохили ҷумҳурӣ низ истеҳсол мешаванд, қарорҳои марбута қабул карда шаванд».
Дар ҳамин ҳол, коҳиши сомонӣ нисбат ба доллари амрикоиро дар БМТ ба омили беруна – буҳрони сиёсию иқтисодӣ, молиявию асъории ҷаҳонӣ ва бад шудани вазъи иқтисодию молиявии шарики асосии савдои хориҷии Тоҷикистон – Русия нисбат медиҳанд.
Бино ба маълумоти Бонки миллии ҷумҳурӣ, омили дигари коҳиши қурби сомонӣ нисбати доллари ИМА афзоиши ҳаҷми воридоти маҳсулот ба кишвар аст.
Қобили зикр аст, ки аз оғози соли равон қурби арзи миллӣ – сомонӣ нисбати доллари ИМА тақрибан ба андозаи 9% коҳиш ёфт.
