Дар рейтинг ё феҳристи нави нашршудаи ФИФА (Федератсиони байналмилалии футбол) чун моҳи гузашта дастаи мунтахаби футболи Тоҷикистон бо касби 215 имтиёз дар зинаи 135-ум боқӣ монд.
Дар зинаҳои аввали рейтинг дастаҳои мунтахаби футболи Олмон, Аргентина, Колумбия, Белгия, Нидерланд ва Бразилия қарор доранд.
Дар ҳамин ҳол, дар байни 46 дастаи миллии кишварҳои Осиё мунтахаби Тоҷикистон дар ҷойи 19-ум ва миёни собиқ кишварҳои Иттиҳоди Шӯравӣ дар мақоми 12-ум (пеш аз Қазоқистон, Туркманистон ва Қирғизистон) қарор дорад. Дар ин қора тимҳои миллии Ҷопон, Эрон ва Кореяи Ҷанубӣ пешсафанд.
Рейтинги ФИФА аз соли 1993-юм ба ин сӯ тартиб дода мешавад. Имтиёзҳо ба кишварҳо аз рӯи натоиҷи дастаи мунтахаби миллиашон дар давраи чаҳор сол дода мешавад. Натиҷаи беҳтарини мунтахаби Тоҷикистон дар тамоми таърихаш дар феҳристи ФИФА ҷойи 106-ум дар моҳи июни соли 2013-ум мебошад.
