Бахши Ҳизби ислоҳоти иқтисодии Тоҷикистон (ҲИИТ) дар ноҳияи Ҳисор имрӯз дар конфронси пешазинтихоботии худ вакили амалкунандаи Маҷлиси намояндагони Маҷлиси Олии Тоҷикистон, узви Кумитаи иқтисоду молияи парлумон Шарофиддин Сироҷовро такроран номзад ба вакилӣ дар парлумони оянда пешбарӣ намуд.
Тавре ба «Азия-Плюс» як манбаъ аз ҲИИТ хабар дод, Ш.Сироҷов моҳи феврали соли 2010 маҳз аз ҳавзаи якмандатии интихоботии Ҳисор номзад ба вакилӣ пешбарӣ шуда буд.
Дар ҳамин ҳол, чанде қабл Ҳизби наҳзати исломии Тоҷикистон аз ҳавзаи мазкур номзадии раиси бахши ҳизб дар ноҳияи Ҳисор Маҳмаднабӣ Бердиевро номзад ба вакилӣ пешбарӣ карда буд.
Як манбаъ аз Ҳизби халқии демократии Тоҷикистон ба «Азия-Плюс» дар робита ба ин масъала иттилоъ дод, ки рӯзи душанбеи ҳафтаи оянда, 12-уми январ ҳизб номзади худро ба вакилӣ аз ин ҳавза муайян мекунад.
