Аз ҳавзаи якмандатии интихоботии Шоҳмансури шаҳри Душанбе Ҳизби халқии демократии Тоҷикистон вакили амалкунандаи парлумони кунунӣ Суҳроб Шариповро номзад ба вакилӣ дар парлумони оянда пешбарӣ кард. Дар ин бора ба «Азия-Плюс» сухангӯи ҲХДТ Усмон Солеҳ хабар дод.
Қобили зикр аст, ки Суҳроб Шарипов айни замон ин ҳавзаи интихоботиро дар Маҷлиси намояндагони Маҷлиси Олии ҷумҳурӣ намояндагӣ мекунад.
Ба иттилои манбаъ, аз ҳавзаи якмандатии интихоботии Фирдавсӣ ҲХДТ ҳамчунин Маҳмадалӣ Ватановро номзад ва вакилӣ дар палатаи поёнии парлумон пешбарӣ намуд. М.Ватанов низ феълан ин ҳавзаро дар даъвати ҳозираи парлумон намояндагӣ мекунад.
Ёдрас мекунем, ки санаи 13-уми январ Ҳизби наҳзати исломии Тоҷикистон аз ҳавзаи якмандатии интихоботии Шоҳмансури пойтахт хатмкардаи Донишгоҳи байнулмилалии Теҳрон ва факултаи фалсафаи Донишгоҳи миллии Тоҷикистон, духтари муасиси ҲНИТ Саид Абуллои Нурӣ, сиёсатшинос Руқия Саидоваро номзад ба вакилӣ дар палатаи поёнии парлумон пешбарӣ кард.
Ҳамчунин мебояд гуфт, ки аз ҳавзаи якмандатии интихоботии мазкур Ҳизби демократи Тоҷикистон яке аз фаъолони ҳизб, журналист Аҳмадшоҳи Комилзодаро номзад ба вакилӣ дар Маҷлиси намояндагон пешбарӣ кардааст.
