Санаи 13 январи соли 2015 вазири корҳои хориҷии Тоҷикистон Сироҷидин Аслов намояндаи доимии Бонки ҷаҳонӣ дар Тоҷикистон Патрисия Виверс-Картерро ба ҳузур пазируфт.
Бино ба иттилои ВКХ Тоҷикистон, зимни мулоқот масъалаҳои тавсеаи ҳамкориҳои минбаъдаи Тоҷикистон бо Бонки ҷаҳонӣ, аз ҷумла вобаста ба рушди иҷтимоӣ ва иқтисодии кишвар мавриди баррасӣ қарор гирифтанд.
Гуфта мешавад, ҳамзамон дар мулоқот мубодилаи судманди афкор оид ба татбиқи Қатъномаи Маҷмаи Умумии СММ таҳти унвони Даҳсолаи байналмилалии амал “Об барои ҳаёт”, 2005-2015 ва талошҳои минбаъда ба мақсади дастрасӣ ба рушди устувори захираҳои об”, ки бо ташаббуси Тоҷикистон қабул гардидааст, сурат гирифт.
«Дар доираи татбиқи Қатънома баргузории ду чорабинии сатҳи баланд, Муколамаи сатҳи баланд дар Маҷмаи Умумии СММ моҳи марти соли 2015 дар ш. Ню-Йорк ва Конфронси байналмилалии сатҳи баланд дар моҳи июни соли 2015 дар ш. Душанбе мавриди муҳокима қарор гардид», – зикр мегардад дар хабари Вазорат.
