Шӯрои сиёсии Ҳизби сотсиал-демократии Тоҷикистон (ҲСДТ) дар бораи муваққатан даст кашидан аз иштирок дар интихобот ба парлумон тасмим гирифт.
Раиси ҲСДТ Раҳматилло Зойиров ба «Азия-Плюс» дар ин робита иттилоъ дод, ки ин қарор дар робита ба содир шудани ҳукми ғайримунсифона нисбати муовини раиси ҳизб адвокат Шуҳрат Қудратов ва ҳамчунин бинобар сабаби афзоиши фишор ва монеъагузориҳо ба ҲСДТ аз ҷониби ҳукуматдорон қабул шудааст.
«Агар мушкилоти дар боло зикргардида ҳал нашаванд, анҷумани фавқулодаи ҳизб даъват шуда, дар он масъалаи эълони таҳрим ба интихобот аз ҷониби ҳизби мо баррасӣ мешавад», – таъкид дошт Зойиров.
Зимнан зикр гардид, ки мутобиқи оинномаи ҲСДТ, анҷумани фавқулодаи ҳизб дар ҳама гуна вақти шабонарӯз даъват шуда метавонад.
