Созмони ҳомии ҳуқуқи Fredoom House ё Хонаи Озодӣ дар гузориши солонаи худ таҳти унвони
«Озодӣ дар ҷаҳон-2015»
Тоҷикистонро боз ба сафи «кишварҳои ноозод» шомил кард.
Дар гузориш қайд мешавад, ки аз рӯи ҷадвали ҳафтбаллӣ вазъи озодиҳои шаҳрвандӣ ва ҳуқуқҳои сиёсӣ дар Тоҷикистон ҳарду 6 баллӣ арзёбӣ шудаанд, ки дар ин ҷадвал балли 1 – беҳтарин ва 7 – бадтарин мебошанд.
Қазоқистон, Русия, Афғонистон ва Эрон низ дар баробари Тоҷикистон дар рӯйхати «кишварҳои ноозод» қарор доранд. Ба қатори «кишварҳои озод» Муғулистон, аксари кишварҳои Аврупо, Австралия, ИМА, Канада ва Бразилия дохил карда шудаанд.
Ӯзбекистон, Туркманистон, Чин, Сурия ва Арабистони Саудӣ дар сафи кишварҳои дорои сатҳи пасттарини озодӣ ҷойгир шудаанд.
Қобили зикр аст, ки ин рейтинг 195 кишвар ва 14 қаламрави бидуни мақомро фаро гирифтааст. Дар
гузориши соли гузаштаи созмон
низ Тоҷикистон дар сафи «кишварҳои ноозод» қарор дошт.
