Коллегияи Суди олии Тоҷикистон дар ҷаласаи имрӯзааш шикояти узви ҲСДТ, адвокат Бузургмеҳр Ёров нисбати Комиссияи марказии интихобот ва раъйпурсӣ (КМИР)-и Тоҷикистонро рад кард.
Тибқи маълумоти аз Суди олӣ ба «Азия-Плюс» расида, коллегияи Суди олӣ ба хулоса расидааст, ки қарори рӯзи 18 феврал қабулшудаи Суди олӣ дар робита ба ин масъала қонунӣ буда, ба бозбинӣ ниёз надорад.
Рӯзи 18 феврал прокурор Комил Зоирзода зимни мурофиа оид ба баррасии ин шикоят дар Суди олӣ дархост намуд, ки шикояти кассатсионии мазкур қонеъ карда нашавад, зеро Бузургмеҳр Ёров ба КМИР маълумотнома дар бораи амволро пешниҳод накарда, гаравпулии интихоботӣ дар ҳаҷми 4 ҳазор сомониро пардохт накардааст ва аз ин рӯ, шикояташ беасос мебошад.
Аммо Ёров дар навбати худ қайд кард, ки ҳеҷ касе ӯро аз пардохти гаравпулӣ огоҳ накардааст ва ӯ омода аст, ки ин маблағро пардохт намояд. «Дигар ҳама ҳуҷҷатҳои заруриро ман ба КМИР пешниҳод кардам ва намедонам, ки онҳо куҷо бедарак шудаанд», – иброз дошт номбурда.
Дар ҳамин ҳол, роҳбари дастгоҳи КМИР Тоҷикистон Абдуманнон Додозода, ки аз манфиатҳои КМИР дар суд ҳимоя мекард, дар ин робита изҳор намуд, ки мутобиқи меъёрҳои пешбинишуда дар моддаи 35-и Қонуни конститутсионии ҶТ «Дар бораи интихобот ба Маҷлиси Олии ҶТ», ҳеҷ касе номзадро дар бораи пардохти гаравпулии интихоботӣ огоҳ намекунад ва ин яке аз шартҳо барои номзадҳо мебошад.
«Ғайр аз ин, Ёров ба КМИР маълумотнома дар бораи амволашро низ пешниҳод накард, ки ҳамчунин ҳуҷҷати зарурӣ барои сабти расмӣ ба сифати номзад ба вакилӣ ба шумор меравад», – таъкид дошт Додозода.
Адвокат Бузургмеҳр Ёров санаи 14 январ ба ҳавзаи интихоботии Сомонӣ №8 бо дархости сабти расмии номзадиаш ба вакилӣ дар Маҷлиси намояндагони Маҷлиси Олии ҶТ муроҷиат намуд, аммо бинобар сабаби ҷой доштани камбудиҳо дар ҳуҷҷатҳояш, ин дархосташ рад шуд.
Дар ҷаласаи рӯзи 12 феврал КМИР аризаи Бузургмеҳр Ёровро баррасӣ намуда, тасмим гирифт, ки қарори қаблан қабулшуда дар бораи рад кардани сабти номзадии Б.Ёров бетағйир гузошта шавад.
