Дар ҷаласаи имрӯзаи Шӯрои сиёсии Ҳизби наҳзати исломии Тоҷикистон иқдомоти ахири баъзе мақомот ва масъалагузории доираҳои ҷудогона дар бораи бастани фаъолияти ҲНИТ мавриди баррасӣ қарор гирифта, он як тарҳи фитнаомез, мухолиф ба қонун ва хатарнок барои субот ва сулҳу ваҳдати кишвар номида шуд.
Дар
баёнияи интишоршудаи Шӯрои сиёсии ҲНИТ
дар ин робита таъкид мегардад, ки «кашонидани доираҳои динии кишвар ва аз забони онҳо матраҳ кардани як пешниҳоди мухолиф ба Конституцияи ҶТ ва Созишномаи сулҳ баёнгари оғози як тарҳи фитнаомези дигар мебошад, ки оқибатҳои бади он бар зарари миллат ва давлат меанҷомад».
«ҲНИТ ҳамчун ягона ҳизби сиёсии динӣ дар минтақа на танҳо дар барқарории сулҳу ваҳдат дар кишвар саҳм гузоштааст, балки бо мавқеъҳои созандаи худ дар самтҳои дохилӣ ва хориҷӣ ҳамчун як неруи муътадили сиесӣ маъруф гаштааст. Агарчи, ин ҳама солҳо болои ҲНИТ фишорҳо ва маҳдудиятҳо вуҷуд доштаанд, роҳбарияти ҳизб талош кардааст, ки аз сиёсати сабр ва таҳаммул истифода намояд», – омадааст дар баёния.
Дар баёнияи Шӯрои сиёсии ҲНИТ аз ҳукуматдорон дархост мешавад, ки пеши роҳи чунин амалҳо ва пешниҳодҳои ғайриқонунӣ ва фитнаомез ҳарчи зудтар гирифта шавад ва гунаҳкорон барои барангехтани низоъи сиёсӣ ва кинаву адоват байни қишрҳои гуногуни ҷомеъа ба ҷавобгарӣ кашида шаванд.
