Аз 15 то 18 апрели 2015 сол дар меҳмонхонаи «Три Короны», вилояти Иссиқкӯл доир ба мавзӯи «Рушди ҳамкорӣ байни истеҳсолкунандагон ва коркардкунандагони маҳсулоти меваю сабзавотии водии Фарғона ва ширкатҳои тиҷоратӣ аз Қазоқистон ва Русия» вохӯрӣ барпо мегардад.
Тавре аз намояндагии Иттиҳоди Аврупо дар ҶТ хабар доданд, вохӯрии мазкур аз ҷониби гурӯҳи ташкилотҳои Осиёи Марказӣ дар ҳамкорӣ бо ташкилоти байналхалқии австриягии Hilfswerk Austria International дар чаҳорчӯбаи лоиҳаи «Рушди иқтисодиёт дар Осиёи Марказӣ тавассути пешбарии ташкилотҳои содиротии миёнрав (ТСМ) ва корхонаҳои хурду миёна (КХМ) дар соҳаи саноати хӯрокворӣ», дар доираи барномаи «Осиёи Марказӣ – Инвест III», ки аз тарафи Иттиҳоди Аврупо маблағгузорӣ мегардад, ташкил карда мешавад.
Ба ташаббуси ташкил кардани вохўрии зикргардида, лоиҳаи минтақавии Барномаи Рушди Созмони милали муттаҳид “Ёрмандӣ ба рушди тиҷорат дар Осиёи Миёна”, ки аз тарафи Ҳукумати Финляндия маблағгузорӣ карда мешавад, ҳамроҳ гардид.
Мақсади вохӯрӣ – таҳияи нақшаи муштараки фаъолият оиди дастрас намудани маҳсулоти тару тоза ва коркардшуда аз водии Фарғона (Ӯзбекистон, Қирғизистон ва Тоҷикистон) ба бозорҳои Қазоқистон ва Русия мебошад. Вохӯрӣ барои пешниҳоди маълумот оиди нерӯи содиротии мавҷудаи истифоданабурдаи водии Фарғона барои ширкатҳои тиҷоратии берунмарзӣ, муҳокимаи ҳаҷм, мӯҳлат, шартҳо ва сифати дастрасшавандаи маҳсулоти меваю сабзавотӣ бо арзиши иловашудаи баланд истифода бурда мешавад.
Дар вохӯрии корӣ роҳбарон, моликон, содиргарон, директорон (шахсоне, ки қарор қабул мекунанд) – и ширкатҳои коркардкунанда ва тиҷоратӣ аз Қазоқистон, Қирғизистон, Русия, Ӯзбекистон ва Тоҷикистон, намояндагони якчанд лоиҳаҳои оид ба рушд ва Ассотсиатсияи корхонаҳои саноати хӯроквории Қирғизистон (ҳамагӣ тақрибан 40 нафар) ширкат меварзанд.
