Кишти пунбадона дар Тоҷикистон дар арафаи анҷомёбист. То имрӯз дар майдони беш аз 90%-и барои кишти ин зироат пешбинишуда кишти он ба итмом расидааст.
Аз хадамоти матбуоти Вазорати кишоварзии ҶТ ба «Азия-Плюс» дар ин робита иттилоъ доданд, ки ба аввали моҳи майи соли равон аз майдони умумии 179,2 ҳазор гектари барои кишти пунадона дар ҷумҳурӣ пешбинӣ шуда дар зиёда аз 162,1 ҳазор гектараш кишти ин зироат ба анҷом расидааст, ки 90,4%-и нақшаро ташкил медиҳад.
Ба иттилои манбаъ, дар вилояти Хатлон дар майдони 116 ҳазор (97,5%), Суғд – 41,6 ҳазор (77%) ва навоҳии тобеи марказ – ҳудуди 3,5 ҳазор гектар (47%) пунбадона кишт шудааст.
Қобили зикр аст, ки маъракаи кишти пунбадона дар Тоҷикистон нимаи моҳи март оғоз гардида, то нимаи моҳи май идома меёбад. Кишоварзони тоҷик имсол дар ҳаҷми тақрибан 400 ҳазор тонна ҳосили пахта ба даст оварданианд.
Ёдрас мекунем, ки соли гузашта дар Тоҷикистон пунбадона дар майдони ҳудуди 178 ҳазор гектар кишт шуда, наздики 390 ҳазор тонна ҳосил ҷамъоварӣ карда шуд.
