Ҳаҷми захираҳои тиллову асъори Бонки миллии Тоҷикистон (БМТ) давоми 4 моҳи соли равон ба миқдори зиёда аз 20 млн. доллари ИМА афзуд.
Бино ба маълумоти хадамоти матбуоти БМТ, ба ҳолати 30 апрели соли 2015 ҳаҷми захираҳои тиллоию асъории Бонки миллии Тоҷикистон беш аз 3 млрд 151 млн. сомониро ташкил додааст, ки ин ба 503,52 млн. долл. ИМА баробар аст.
Гуфта мешавад, аз он ҷумла, 2 млрд. 183,72 млн. сомониро тиллои монетарӣ ва 967,32 млн. сомониро асъори хориҷӣ ташкил медиҳад.
Қобили зикр аст, ки аввали соли равон зимни нишасти хабарӣ дар Душанбе раҳбарияти БМТ изҳор дошта буд, ки ҳаҷми захираҳои байнулмилалии бонк дар ифодаи пулӣ бо шумули захираҳои асъори байнулмилалӣ, коғазҳои қиматнок ва ҳамчунин тиллои монетарӣ бо вазни 11 тонна ҳудуди 481 млн. доллари ИМА-ро ташкил медиҳад.
