Зимни суханронӣ дар Конфронси байналмилалии сатҳи баланд доир ба ҷамъбасти раванди татбиқи амалии Даҳсолаи байналмилалии амалиёти «Об барои ҳаёт», солҳои 2005-2015, ки имрӯз дар Душанбе ба кор шурӯъ намуд, нахуствазири Покистон Муҳаммад Навоз Шариф изҳор намуд, ки об сарчашмаи ҳаёт буда, талабот ба он дар саросари ҷаҳон пайваста меафзояд.
«Мо ба мушкилоти тағйирёбии иқлим дучор мешавем, ки ба мавҷуд набудани дастрасӣ ба об боис мегардад. Бар асари ин мушкилот бахши кишоварзии Покистон рушд намеёбад», – гуфт ӯ.
Қобили зикр аст, ки конфронси мазкур зиёда аз 1500 ширкаткунандагонро бештар аз 100 кишвар ва минтақаҳои гуногуни олам, ки Ҳукумат, ниҳодҳои СММ, созмонҳои байналмилалӣ, ҷомеаи шаҳрвандӣ ва дигар ҷонибҳои манфиатдорро муаррифӣ мекунанд, ҷамъ овардааст.
Дар чаҳорчӯби конфронс 9-10 июни соли 2015 ду ҷаласаи сатҳи баланд роҷеъ ба татбиқи Даҳсола, шаш мизи мудаввари сатҳи баланд доир ба муҳокимаи амалҳои минбаъда барои азхудкунии устувори захираҳои об, ҳамчунин 9 чорабинии мавзӯӣ, намоиши байналмилалии “Об барои ҳаёт” гузаронида мешаванд.
