Нӯшокиҳои истеҳсолкардаи ҶСП «Оби Зулол» ба бозори Кувайт ворид карда мешаванд. Рӯзи 10 июн дар бораи таҳвили нӯшокиҳо ҳуҷҷатҳо ба имзо расиданд.
Раиси Шӯрои мудирони ҶСП «Оби Зулол» Рустам Болтаев ба «Азия-Плюс» дар ин робита иттилоъ дод, ки аз моҳи июл 10 контейнер нӯшокӣ ва об ҳар моҳ ба Кувайт содирот мешаванд, ки ҳудуди 20 тоннаро ташкил медиҳанд.
«Аз лиҳози хусусиятҳои физикӣ ва кимиёвӣ маҳсулоти мо бешубҳа дар ин бозор ҷойи худро меёбад. Ин бозор ҳамчунин бо дигар маҳсулоти хушсифат таъмин аст. Гап сари он аст, ки то куҷо мо ин иқдомро аз нигоҳи бозорёбӣ (маркетинг) дастгирӣ карда метавонем, чунки сари ин масъала мо бо ширкатҳои бузурги ҷаҳонӣ имкони рақобат надорем», – қайд кард Болтаев.
Ба қавли номбурда, алҳол мақсад аз қарордоди мазкур ба даст овардани фоида набуда, асосаш он аст, ки маҳсулот дар бозори Кувайт ҷойи худро пайдо намояд.
Зимнан зикр гардид, ки айни замон ҶСП «Оби Зулол» ҳамроҳ бо «Тоҷпромбонк» ба сохтмони як корхона дар шаҳри Душанбе идома медиҳад ва эҳтимол аллакай моҳи оянда корҳои озмоишӣ дар он ба итмом расанд.
Қобили зикр аст, ки айни замон маҳсулоти ҶСП «Оби Зулол» ба Қазхоқистон содирот мешавад.
