Куриё марҳилаи дуюми лоиҳаи “Сохтмони таъминоти нерӯи барқ”-ро дар ҷамоати Ромити шаҳри Ваҳдат оғоз кард. Маросими оғози корҳои сохтмонӣ рӯзи 4-уми апрел дар зеристгоҳи барқии Явроз баргузор шуд.
Дар маросим Ҷон Сонг-сик, сафири Корея дар Тоҷикистон, Манучеҳр Сафарзода, муовини вазири энергетика ва захираҳои об ва Мирзо Исмоилзода, раиси шаҳри Ваҳдат ширкат доштанд.
Лоиҳа тавассути Оҷонсии Куриё оид ба ҳамкории байналмилалӣ (KOICA) амалӣ гардида, ҳадафи он беҳтар намудани дастрасии аҳолии минтақаҳои кӯҳистон ба нерӯи барқ мебошад.
Барои амалисозии ин тарҳ Куриё 14 миллион доллар ҷудо кардааст.
Дар доираи марҳилаи дуюм сохтмони зеристгоҳи нави барқии Явроз (110/10 кВ), васеъсозии зеристгоҳи Ромит (110/20/10 кВ), насби трансформаторҳои нав ва кашидани 60 километр хатҳои интиқол ва тақсимоти барқ пешбинӣ шудааст. Бо татбиқи лоиҳа 15 деҳаи ҷамоати Ромит фаро гирифта шуда, зиёда аз 8 ҳазор сокин ба барқ дастрасӣ пайдо мекунанд.
Сафири Корея ин лоиҳаро “рамзи дӯстии ду кишвар” номида, изҳори умед кардааст, ки он ба беҳбуди зиндагии сокинон мусоидат хоҳад кард.
“Ин лоиҳа рамзи дӯстии Корея ва Тоҷикистон мебошад. Хеле хушҳолам, ки метавонем ҷомеаи Тоҷикистонро дастгирӣ намоем. Ба анҷоми муваффақонаи лоиҳа умеди зиёд дорем”, – гуфтааст ӯ.
Сафарзода Манучеҳр, муовини вазири энерҷӣ ва захираҳои оби Тоҷикистон таъкид кардааст, ки вазорат ҷиҳати беҳтар намудани сатҳи зиндагии аҳолии маҳаллӣ тамоми кӯшишҳои худро равона хоҳад кард.
Ҳамзамон, Мирзо Исмоилзода, раиси шаҳри Ваҳдат зикр кардааст, ки натиҷаҳои марҳилаи аввал ҳатто минтақаҳои кӯҳистониро фаро гирифта, ба беҳтар шудани шароити зиндагии сокинон мусоидат намуд.
Қаблан, дар солҳои 2017–2021 давлати Куриё марҳилаи аввали лоиҳаи таъминоти барқро барои 9 деҳа (тақрибан 1 500 хоҷагӣ) тавассути сохтмони зеристгоҳи нав ва хатҳои тақсимоти барқ дар минтақаи Ромит амалӣ карда буд. Лоиҳаи мазкур марҳилаи дуюми ин ташаббус буда, Куриё дастгирии пайвастаи таъминоти нерӯи барқро бо мақсади беҳтар намудани сатҳи зиндагии сокинони минтақаҳои кӯҳистонии Тоҷикистон идома медиҳад.
Ба гуфтаи масъулон, ин иқдом ба беҳтар шудани шароити зиндагии сокинон, фаъолияти муассисаҳои таълимӣ ва тиббӣ, инчунин рушди иқтисоди маҳаллӣ, аз ҷумла парвариши моҳии форел, мусоидат кардааст.
